إلنا ولا لليهود
إلنا ؟
لأ لليهود
لا لا إلنا…
هي صحيح إلنا ولا لليهود؟!
والله منا عارفة الصحيح! ، طيب خلونا نشوف..
من أنا وصغيرة بسمع العرب والمسلمين بيهتفوا وبيقولوا : ” ع القدس رايحين شهداء بالملايين ” ، طيب وينهم ؟ الصراحة أنا مشفتش حدا بيستشهد مش فلسطيني ! ،ولا هو ساعة الجد بصير “الزلمة اللي بيرجع بكلمته !
طيب هلقيت لوقلنا انو قبة الصخرة دهب..
هي صحيح دهب ولا قشرة ؟!..
مش موضوعنا ..المهم لو على فرض انها دهب ولو ان القشرة مش رخيصة كتير يعني ،لو إجينا و قلنا بدنا نقسم قبة الصخرة وكل واحد ياخد نصيبه، قولتكم أكم عربي ومسلم هيقول انا بدي حصتي ؟!
بلاش العرب ..اليهود هان ايش هيقولوا؟!
جاوبوني يمكن وقتها أقدر أحدد هي القدس إلنا ولا لليهود..!
طيب بلاش..
هلقيت مش بيقولوا انه إحنا واليهود بالأصل الأصل ولاد عم !
طيب ليش بنتقاتل عالقدس فهموني؟!
هي عندنا قدس وعندهم قدس “شرقية وغربية ” وهينا عايشين مع بعض ، مبسوطين وماشي الحال، أي كتر خيرهم اللي سامحين النا نصلي بالقدس، وبالنسبة للشباب يعني مهل عليهم بس يكبرولهم شوي ويقربوا يموتوا بيصيروا يصلوا في القدس على ايش مستعجلين يعني !
أصبح ليش بنتخانق يعني..معقول برضو على قبة الصخرة ..دهب كانت ولا قشرة ؟!
بعدين مالكم ياناس ؟ ،هو احنا كنا طايلين ، هي صار عنا دولتين مين قدنا ؟ هيّ عمرها صارت يكون في البلد الوحدة دولتين يا عمي والله احنا زعران وما في حدا قدنا ولا بيقدر يعمل زينا ، وكتر خيرهم اليهود كمان مرة عشانهم مساعدينا !
طيب برضو مرسيناش على بر..هي إلنا ولا لليهود ؟!
معقول لليهود ؟! ..لأ ياشيخ القدس إلنا ..
طيب وين المشكلة ؟ محنا حتى في الصلاة بيفصلش بينا وبين ولاد عمنا “اليهود” إلا حيط “حائط المبكى”..إحنا بنصلي في ناحية وهم بيخبطوا روسهم في الناحية التانية ..
وهيهم ليل نهار نازلين حفر وتكسير وتخبيط و محدش بيقوللهم وين انتو؟ معناتوهيّ إلهم…لا ياعمي ايش هالهبل؟! القدس إلنا، مش احنا بنقول دايما ” ع القدس رايحين شهداء بالملايين”، هو صحيح احنا محددناش امتى بالزبط بس احنا رايحين يعني رايحين وان شاءالله بالملايين..
يااااا الله ..والله مخي إلتوح..يوووووه حدا يجاوبني ..هي القدس إلنا ولا لليهود..؟!
فلسطينيّةٌ عَصيّة أسكنُ غّزة 